عزيزي أنا
جربت تكلم قبل كده حد قريب منك وتشرحله كل مشاعرك ومخاوفك و أفكارك؟ طب جربت تكلم نفسك وتناقشها وتعرف عنها أكتر؟ كلمة journaling او تسجيل اليوميات من الكلمات اللي دايما ارتبطت في عقولنا بالبنات والكراسة الوردي والرومانسية أو بسيرة العظماء والأدباء ولكن يا ترى هل هي كده فعلا؟
هل هي كده فعلا؟
أكيد لأ تسجيل اليوميات من أهم الطرق في زيادة الوعي الذاتي ببساطة بتعرفنا أكتر عن نفسنا,أفكارنا,مشاعرنا,إمتي بنفرح؟,إمتي بنزعل؟ وإمتي بنغضب؟ بالإضافة لده بتخلينا قادرين علي تنظيم وترتيب فوضى الأفكار والمشاعر اللي بنحس بيها يومياً والأكتر من ده قرائتنا ليها في المستقبل بتخلينا ممتنين لحاجات كتير كانت سبب في ما نحن عليه وبتخلينا مدركين بأن مهما كان الشعور اللي حاسين بيه فهو سيمر وده بيخلينا نشكر ونحمد ونصبر ونتفائل
طب أعمل أيه
تسجيل اليوميات مش بالضرورة إنك تكتب كل دقيقة فيومك وكل نفس بتتنفسه بالعكس إنت بتكتب الأحداث اللي أثرت فيك وحسستك بشعور ما أثرت في طريقة تفكيرك وإستثارت عقلك بطريقة ما ممكن يكون موقف حصلك في الشارع إنجاز بسيط حققته فكرة جت فدماغك أما عن طريقة الكتابة فاختار الطريقة المريحة بالنسبالك اختار اللغة اللي تقدر تعبر بيها كويس عن مشاعرك وأفكارك تجاهل الأخطاء اللغوية والقواعد الإملائية افتكر إنك بتكتب لنفسك محدش هيقراها ادعي,إسأل,فضفض أو حتي صيح اكتب بالطريقة اللي تقدر تعبر بيها عن فوضى عقلك
وبس كده
خليك دايماً فاكر “أنك تكتب لنفسك فرجاءً كن صادقاً مع نفسك في مناقشة وشرح وعرض كل ما يدور في رأسك من أفكار ومشاعر“