قوم ولعلك شمعة
مخنوق ؟ طبيعي وسط ضغوطات الحياة وهموم الدنيا طبيعي اننا كبشر نحس بخنقة وإن الدنيا كلها جاية علينا ولكن اللي مش طبيعي إننا نستسلم للشعور لحد ما يتحول من مجرد سحابة صيف وهتعدي الي مرض عضال طب ممكن نعمل ايه عشان نعدي فترة الخنقة في سلام
طب أعمل إيه
- قبل أي حاجة قرب من ربنا بأي وسيلة وبكل الطرق الممكنة فإن همومك ضاقت عليها الأرض فأبواب السماء أكثر اتساعا
- راجع نظام أكلك والأدوية بتاعتك لأن بعض الأدوية والمأكولات ممكن تسبب الشعور ده
- فضفض لصديق,لقريب حتى لو لنفسك في ريكورد أو كتابة ساعات كتير مجرد ان احنا نحكي مشاكلنا بيحسسنا براحة أكبر
- متضايق ؟ قدم مساعدة لحد خلي شخص يضحك طبطب علي حد تصدق ولو بالبسيط جرب وهتحس بفرق كبير
- إعمل حاجة أنت بتحبها لمجرد إنك بتحبها وخصصلها وقت فيومك حاول تاخد فترات راحة مناسبة تفصل بيها بين مهام يومك وبالمناسبة “السوشيال ميديا مش راحة”
- مواقع التواصل الأجتماعي نوافذ لعرض لحظات مختارة بعناية من حياة أشخاص آخرين فخلي بالك الحياة مش كلها وردي
- خصص وقت معين يوميا أو على الاقل أسبوعيا تقضيه مع عيتلك وأصحابك لان ليهم حق عليك
- أما في حالة إنك لسه مخنوق فافتكر إن العلاج والارشاد النفسي مش جريمة بل العكس اللجوء للمتخصصين في الحالات دي بيكون قرار ذكي وعقلاني وخصوصا إنه قرار مبقاش صعب ومكلف في الوقت الحالي
وبس كده
خليك دايما فاكر إن طبيعي إننا نحس بالخنقة ولكن اللي مش طبيعي إننا ننسى إن لكل عتمة ليل فجر