اليوم الثالث | عائلة
حبيت إن كلمة النهاردة أكتب عنها بالعامية وخصوصا إني لما شوفت الكلمة بدأت أفكر في معنى حقيقي وواضح لكلمة عائلة. الفكرة إن من كتر ما إحنا بنستخدم الكلمة فكرت إن معناها أكيد بديهي اللي هو يعني ايه عائلة ؟ يعني بابا وماما وأنور وجدي و كده 😂 الفكرة فعلا إن أغلب الكلمات اللي فاكرين معناها بديهي في الأغلب مش بنبقى مدركين معناها فعلا ولكن لو بحثنا في المعجم عن المعنى اللغوي لكلمة عائلة هنلاقي الجملة دي “من يعيشون في بيت واحد وتربطهم القربى” بس لو اعتمدنا التعريف ده هنحصر تعريف العيلة في أشخاص وده في ظلم للمعنى بالنسبالي على الأقل.
العيلة بالنسبالي مجموعة مشاعر أساسها الود مش مجرد أشخاص العيلة بالنسبالي حضن في لحظة إنهيار.
العيلة بالنسبالي تقبل في لحظة إحساس بالرفض . العيلة بالنسبالي احتواء في لحظة إحساس بالنبذ . العيلة بالنسبالي دفى وحنان وسط قسوة العالم.
العيلة بالنسبالي هي بناء أساسه المودة ممكن البناء ده يختلف شكله ممكن يكون كوخ بسيط، عمارة، فيلا أو حتى خيمة ولكن الجوهر واحد والأساس مهم وغيابه بيؤدي لإختلال البناء ده. تلخيصا فإن العائلة هي ملاذك الآمن في عالم لا قلب له.
#Decwriter2022 #Medwriter2022 #ميدرايتر2022 #ديسرايتر 2022