كل سنة وإنت منسي
تعالى عزيزي القارئ وعزيزتي القارئة نسأل سؤال سريع كده ,لو فتحنا التلفزيون دلوقتي على أي برنامج حواري نسائي تفتكر إيه أكتر موضوع هيكونوا بيتكلموا عنه؟… الأغلب بيتكلم عن قد أيه الرجالة بقت مشكلة في الوقت ده وحجم المعاناة اللي بيشوفوها بسبب الكائن الغريب اللي اسمه راجل ,طب بلاش التلفزيون والإعلام تيجي نشوف الــtimeline للفيس بوك ماعتقدش هيختلف كتير سيبكم من ده وتعالى اسألك عيد الأب بيكون يوم كام ؟ أو حتى شهر ايه ؟ طب تعرف إن شهر نوفمبر من كل سنة بيكون مخصص للتوعية بالراجل؟… أكيد متفاجئ صح وهى دى الفكرة الرجالة من قديم الأزل والكلام والفضفضة بالنسبالهم Taboo أو خطيئة.
فضفضة و شكوى = ضعف و الراجل عمره مايكون ضعيف وطبعاًً القانون المجتمعي الثابت بيقول طالما أنت مابتتكلمش و مابتشتكيش يبقى أنت كويس وبخير ومش مظلوم وبالتالي أنت واخد كل حقوقك ومش هنقبل بأي تقصير.
وده للأسف بيخلق ضغط على الراجل بشكل كبير جداً يعني مش هنتفاجئ مثلا لما نعرف إن النساء المصابين بالأكتئاب ضعف عدد الرجالة ولكننا هنتفاجئ لما نعرف إن عدد اللي بتتطور حالتهم من الأكتئاب للأنتحار من الرجالة أربع أضعاف عدد النساء واحتمال عدد الرجال المكتئبين يكون أكبر بمراحل ولكن الفكرة إنهم مابيتكلموش ونتيجة ده بيكون في ضغط مستمر على الراجل واللي بيزود الضغط ده هو اضطهاد المجتمع للراجل وده وضع مجتمعي سائد بندعى ربنا إنه ينتهي عن قريب.
في النهاية عايزين نقول ليك عزيزي الراجل كل اللي إنت محتاجه في الفترة دي إنك تتكلم تفضفض تحكي عشان العادة دي تنتهي إتكلم لأن ده حقك ,إتكلم وأكيد هتلاقي اللي هيسمعك. الموضوع صعب طبيعي ولكن محتاج إنك تبدأ وتقدر تكسر الدايرة وتربي الأجيال الجاية علي إن الكلام مش عيب وان الضعف للراجل مسموح.
أما ليكي عزيزتي الأنثى أحنا منقدرش ننكر إن النساء مظلومين وبيتعرضوا للحاجات صعبة كتير ولكن كوني متأكدة إن نفس المجتمع ما بيفرقش بين راجل وست في الظلم ومركز أكتر مع الست فبلاش نصعب الحياة على بعض.
#نفسك #صحتك_النفسية_مش_رفاهية