ب 2 جنيه حنان
تخيل كده عزيزي القارئ تكون واقف في المترو أو المواصلات وشخص وسيم ببدلة شيك وچنتل مان كده ماسك ورقة مكتوب عليها محتاج حضن!! الموضوع مضحك وغريب، صح؟
لو ركزنا شوية هنلاقي إن في مجتمعنا بيكون طلب الراجل للإهتمام أو الحنان ده شئ غير مألوف أو حاجة مش منطقية وده بيظهر جداً في مواقف بسيطة، عندك مثلاً لحظات العزا اللي ما بيكونش مسموح فيها للراجل إنه يمارس حقه الطبيعي والمشروع كإنسان إنه يعيط وبنبدأ في الموقف ده نسمع كلام زي “إنت راجل متعيطش”، “عيب يا أبني أومال سيبت إيه لإخواتك البنات”، “إنشف كده مفيش راجل بيعيط” كأن كونك راجل ده معناه إنك تتمنع من ممارسة حقك الطبيعي كإنسان في الحزن على فراق شخص عزيز عليك ومش بس في العزا مواقف كتير جداً بيتمنع فيها الراجل إنه يعبر عن مشاعره الطبيعية.
في بيوت وأسر كتير بتهمل فكرة الصحة العاطفية لأبنائها الذكور وده عشان ينشف ويبقى راجل فإحنا نمنع الأحضان عشان إنت راجل, نمنع الطبطبة عشان إنت راجل, نمنع العياط والدموع, وبكده بيكون الراجل في موقف لا يحسد عليه.
وبكده أبسط احتياجاته مش قادر يلبيها أو يحصل عليها وهو الحنان والعاطفة فيبدأ الراجل أو الولد يدور على الحنان ده في أماكن وأشخاص تانيين، فنسمع عن علاقات عاطفية فاشلة كتير بتحصل في سن صغير وبين طلاب المدارس، ونسمع عن الإدمان وصحبة السوء وبعديها نسمع عن الاكتئاب والأمراض النفسية فنسمع عن الانتحار وهكذا.. تخيل إن كل ده كان ممكن يكون أقل وأخف بمجرد حضن وشوية حنان.
وبما إننا عزيزي القارئ وعزيزتي القارئة شباب المستقبل فضروري جداً ناخد بالنا كويس إن أولادنا فى المستقبل يكون عندهم العاطفة والحنان اللي هما محتاجينها عشان ما يبقوش متسولين حنان.
دمتم بخير وصحتكم النفسية بخير
قولنا في الكومنتات، إمتى بتحس إنك محتاج حنان؟
#طلع_مشاعرك_تفك #نفسك #صحتك_النفسية_مش_رفاهية