راجل ولا إنسان ؟
مستغرب السؤال صح؟
هو ده الموقف اللي الرجالة بتتحط فيه في بداية عمرهم، ولد عيب أنت هتعيط عيب أنت راجل، يعني إيه مش عارف تاخد قرار فوق كده أنت راجل.
مع نهاية سنين الجامعة وممكن قبل كده بتبدأ أنت كراجل تسرح بخيالك وتفكر يا ترى هعمل إيه بعد الجامعة هل هلاقي شغل؟!
طب هل هلاقي البنت اللي هنبدأ حياتنا مع بعض؟! هل هعرف أجيب شقة؟! طب ولو جبت هعرف أوفر فلوس للمستقبل؟!والعربية ياااااه ده أنا نسيت ممكن يبقي ليا جيش.. يا ترى سنة لأ أكيد أنا عارف إني نحس أكيد هيبقى ٣ سنين!! وطبعاً هخرج لسه هبدأ من الصفر والبنت اللي أنا بحبها هتسيبني.
وهكذا وتفضل الدايرة لحد ما فجأة تكتشف أن عمرك كله بيضيع وأنت مهموم وشايل هم لسه أوانه مجاش وطبعاً عشان طبيعة الراجل الشرقي اللي عمره ما بيتكلم أو بيشارك اللي جواه، هتخلي الضغط علي الراجل كبير بدرجة مش معقولة، وعشان كده محتاجين نرجع نكون بشر تاني لينا لحظات بنضعف فيها ونعترف بده عشان نقدر نتعامل معاه ونلاقي مساعدة من اللي حوالينا تقدر تخلينا نتخطي اللي احنا بنمر بيه!
مهم جداً تعرف إنك إنسان فطبيعي إنك تغلط وتحس وتخاف وتمر بمشاعر كتير والصح إنك تتكلم عن ده وتشاركه وكونك راجل دي حاجة ماتعيبكش ولا تخليك كاتم جواك. ماتخافش من أي حاجة ولا تشيل نفسك فوق طاقتها واعرف إنك مش لوحدك خالص في اللي أنت بتمر بيه!
دمتم بخير وصحتكم النفسية بخير
عشان كده محتاجين نقولك #طلع_مشاعرك_تفك
#طلع_مشاعرك_تفك #نفسك #صحتك_النفسية_مش_رفاهية